Tabakalera-Morpho Nazioarteko elkarlan-deialdia

Artisten mugikortasuna babesteko, horretan laguntzeko eta artisten arteko truke kulturala eta diziplina-aniztasuna sustatzeko, Morpho eta Tabakalerak sorkluntza zentroek egonaldi-programa bat jarri dute abian, Etxepare Euskal Institutuaren lankidetzarekin.

Deialdi hau euren praktika artistikoa Euskal Autonomia Erkidegoan, Nafarroan edo Euskal Hirigune Elkargoan garatzen duten eta Morphon testuinguru artistiko berriak esploratu eta praktikan jartzen dituzten bitartean, euren ibilbide artistikoa zabaldu nahi duten artistei zuzenduta dago. Deialdiaren oinarriak kontsultatu daitezke hemen. Proposamenak bidaltzeko epea apirilaren 3an amaituko da.

Egonaldiak, zortzi aste iraungo du, eta lekua, testuingurua eta denbora eskainiko ditu proiektu artistiko bat garatzeko. Egonaldia 2023ko abuztutik irailera egingo da Morphon (Anberes, Belgika).

Jasotako proposamen guztien artean proiektu bat aukeratuko da. Ingelesa jakin behar da, maila aurreratuan edo, gutxienez, erdi-mailan.

Zalantzak argitzeko edo informazio gehiago eskatzeko: pgaraikideak@tabakalera.eus

Vlaanderen -  Baskenland

Ekimena Vlaanderen - Baskenland proiektuaren testuinguruan kokatzen da. Proiektu horren helburua Flandrian eta Euskal Herriaren arteko harremanak estutzea da, kulturaren eta sorkuntza garaikidearen esparruan, eta bi lurraldeetako sortzaileen eta kultura-agenteen arteko topaketen emaitza da, 2021 eta 2022an egin zirenak. Vlaanderen Baskenland-ek jarraipena emango die 2023an eta 2024an Euskadirako estrategikoak diren eskualdeekin, hala nola Eskozia (Scotland Goes Basque) eta Quebec (Saison Quebec Pays Basque).