Euskal idazle batek Galizian egonaldia egiteko deialdia zabalik

Etxepare Euskal Institutuak 1863 Literatur Egoitzarekin batera deialdia zabaldu du 2023ko azaroan euskal idazle batek Coruñan egonaldia egiteko.

Deialdiaren xedea euskarazko eta edozein literatura-generotako egileentzako egonaldi bat sustatzea da. Egonaldiaren helburua euskarazko literatura-sorkuntza sustatzea eta bultzatzea da, baldintza onetan eta aldi berean kultura-bizitza aberatsa duen Coruñako testuinguruan murgilduta.

Euskal idazle bati bere sormenezko idazketa-proiektuari arreta osoz heltzeko, testuinguru egoki batean eskaintzea du xede egonaldiak. Gainera, hautatutako idazleak lehentasunezko sarbidea izango du Coruñako museo, liburutegi, kontzertu, literatur topaketa, antzezlan eta bestelako ekitaldietarako sarbidea.

Proposamenak bidaltzeko epea ekainaren 15etik uztailaren 15era bitartean egongo da zabalik (biak barne). Deialdian parte hartzeko ezinbestekoa izango da 18 urtetik gora izatea eta gutxienez edozein generoko euskarazko liburu bat argitaratu izana.

Etxepare Euskal Institutuak egonaldia babestuko du eta deialdiaren onuradunaren joan-etorriak, dietak eta ostatua ordainduko ditu. Idazle hautatuak bere egonaldian zehar gutxienez 1896 Literatur Egoitzaren ekitaldi batean parte hartu beharko du eta bertan lankidetzaren berri emango du.

Aurkeztutako proiektuak Etxepare Euskal Institutuak eta 1863 Literatur Egoitzak izendatutako Balorazio Batzorde batek hautatuko ditu. Literatur sorkuntzan ospe handia duten profesionalek osatuko dute, eta horiek aukeratuko dituzte, behar bezala justifikatuta, egoitzako programa honetarako hautagairik onena. Batzordeak honako alor hauek ebaluatuko ditu.

• Literatura-proiektuaren interesa, kalitatea eta bideragarritasuna.
• Aurreko ibilbidearen bikaintasuna.
• Motibazio-gutunaren egokitasuna.

Deialdiaren ebazpena uztailaren biharren hamabostaldian jakinaraziko da posta elektronikoz. Deialdiaren oinarriak Etxepare Euskal Institutuko webguneko deialdien atalean daude eskuragarri. Egoitzako programa honekin lotutako edozein zalantza argitzeko, etxepare@etxepare.eus helbidera jo dezakezue.