Abian da literatura laginak itzultzeko deialdia (2024)

Etxepare Euskal Institutuak bere xedeen artean du jatorriz euskaraz idatzitako literatura nazioartean sustatzea. Xede horretan aurrera egin ahal izateko ezinbesteko dira atzerriko hizkuntzetara itzulitako laginak izatea. Hori dela eta, atzerrian euskal literatura sustatzeko literatura lanen itzulpen laginak proposatzeko deialdia kaleratu da, aipatutako lagin horiek atzerriko hizkuntzetara itzul daitezen. Proposamenak aurkezteko epea 2024ko otsailaren 1ean zabaldu da eta diru zuzkidura amaitzen denean amaituko da.

Deialdi honetan editoreek edo itzultzaileek eman dezakete izena literatura-lan baten pasarte edo zatien itzulpenak finantzatzeko. Honela, egilearentzat berarentzat ere onura zuzena sortzen da, izan ere, bere lanaren ingelesezko edota frantsesezko itzulpenaren lagina eskuratzen baitu, bere helburuak lortzeko erabil dezakeena. Deialdi hau automatikoa da, hau da, ezarritako baldintzak betetzen dituzten eskaera guztiek laguntza jasotzen dute itzulpena finantzatzeko. Jarraian, lagin hauek euskal literatura- laginen ataria atarian jartzen dira eskuragarri.

Aipatutako laginak ingelesera edo frantsesera itzuli beharko dira eta ez dira izango liburuaren %15 baino luzeagoak.

Etxepare Euskal Institutuak 8.000 euro bideratuko ditu proposatutako laginak itzultzera; gehienez ere 400 euro bideratuko dira itzulpen bakoitzera.

Etxepare Euskal Institutuak 2021etik urtero ateratzen du literatura-laginen itzulpenerako laguntzen deialdia. Aurten, www.basquebooks.eus webgunean euskal literatura- laginen ataria abian jarri du, argitalpen eskubideen salmenta errazteko eta euskarazko literatura-lanen zabalkundea sustatzeko. Atariak 2021etik deialdi honen bitartez itzulitako laginak eta 2021etik Euskadi Sarietako lanen itzulpen laginak biltzen ditu.

Deialdira aurkeztu nahi izanez gero jarraitu beharrek tramitazioa hemen topatu daiteke.