Irakurleen VII. topaketa

Berlin, Helsinki, Habana, Chicago, Mexiko Hiria, Paris edota Liverpool bezalako hirietan pasa dute ikasturtea, eta bihar Donostiako San Telmo Museoan elkartuko dira. Etxepare Euskal Institutuaren irakurletza sarea osatzen duten irakurleak dira, hau da, Euskal Herritik kanpoko unibertsitate batean euskara eta euskal kultura eskolak ematen dituzte. VII. Irakurle Topaketan ikusiko dute elkar, 16k bertatik bertara eta seik online, ikasturtearen balorazioa egiteko, esperientziak partekatzeko eta dituzten erronken inguruan hausnartzeko. Haien artean, datorren ikasturtean lehen aldiz euskara eta euskal kultura eskolak emango dituzten zazpi lagun.