Frank Bidart katedra 2022: irekiera jardunaldiak

Frank Bidart katedraren irekiera jardunaldia eta kultur programazioa burutuko dituzte abenduaren 4ean eta 5ean California State University Bakersfield-en. Jarduera desberdinak egingo dira Frank Bidarten inguruan eta gaur egungo zenbait sortzaileri ahotsa emateko asmoz.

Abenduaren 4ean, igandean, 12:00etan (Euskal Herriko 21:00etan) Twitch elkarrizketak egingo dizkiete Miren Agur Meabe idazleari eta Irene Larraza Etxepare Euskal Institutuko zuzendariari Iruñe Astitz (ARKKUSO) eta Eneko Oroz (Ekintaekin) twitchlariek.

Gainera, Miren Agur Meaberen testuen irakurketa (euskaraz eta ingelesez) ere egingo dute.

Hurrengo egunean, abenduak 5, Amaia Gabantxo eta Sabrina Otaegirekin solastuko dira, ordu berean.

Frank Bidart katedraren irekiera jardunaldia 13:00etatik aurrera egingo da Dezember Reading Room aretoan, California State University Bakersfieldeko Walter W. Stiern Library-n.

Hitzarmenaren sinadura ekitaldia egingo dute lehenengo, CSUBko Steve Gamboa eta Lynette Zelezny zein Irene Larrazak. Jarraian, Matthew Woodman irakasleak Bidart-en pasarteen irakurketa egingo du eta Miren Agur Meabek bere pasarteena.

14:00etako ‘Remote Writers: Close Connections Among Minor/Small Cultures’ mahai inguruarekin itxiko dute egitaraua. Parte hartzaileak izango dira Miren Agur Meabe idazle eta poeta; Alison Posey Pepperdine University-ko irakaslea; Viola Miglio, UCSB-ko irakaslea; Iker Arranz Otaegui CSUB Institute for Basque Studies-eko kozuzendaria, Euskal Ikasketetako irakaslea, moderatzaile ariko dena.

Frank Bidart Katedraren baitan, 2022tik, arlo akademikoa eta/edo artistikoa landuko dira CSUB unibertsitateko Euskal Ikasketen Institutuan. Egonaldia bai ikerketako eta baita sorkuntzako proiektua garatzeko izango da. Hautatutako aditu edo sortzaileak ikerketarako edo sorkuntzarako hilabeteko egonaldia egingo du, Euskal Ikasketen Institutuan.