Bi euskal film labur, Annecyko animazio-jaialdi ospetsuan

Euskal zinemak munduko animazio-jaialdi ezagunenean parte hartuko du. Bertsio digitalean gauzatuko da lehiaketa, ekainaren 15etik 20ra, eta Eusko Jaurlaritzak babestutako bi film labur egongo dira ikusgai. Alberto Vázquez-en ‘Homeless Home’ eta Izibene Oñederraren ‘Lursaguak. Bizi-eszena’ dira hautatutako lanak.

Annecy Nazioarteko Jaialdiak, animazioari buruzko munduko topaketarik handienak, bi euskal film labur hautatu ditu: Alberto Vázquezen ‘Homeless Home’ eta Izibene Oñederraren ‘Lursaguak. Bizi-eszenak´. Lehiaketa ekainaren 15etik 20ra bitartean burutuko da, modu digitalean, pandemiaren eraginez bertan behera geratu ez dadin. Albiste bikaina da euskal ikus-entzunezkoen industriarentzat, une zailak bizi baititu COVID-19 koronabirusari aurre egiteko xedez ezarritako geldialdiaren ondorioz.

Annecyk 94 herrialdetako 3.000 lan baino gehiago jaso ditu bere lau kategorietan: film laburrak, graduazio-filmak, telebistako filmak eta film komisionatuak. Munduko animazioaren elitean daude bi euskal film laburrak, eta Eusko Jaurlaritzako Kultura eta Hizkuntza Politika sailaren ekoizpenerako laguntza jaso dute. Guztira, 37 lan hartzen dituen film laburren kategorian lehiatuko dira biak. Horien artean Espainiako beste bi lan daude: Brasilekin elkarlanean koproduzitutako Camila Katerren ‘Haragia’ eta Begoña Arostegiren ‘Ni’.

UniKo produkzio-etxeko ekoizle exekutiboa den Ivan Miñambresek ekoiztuta Alberto Vázquezek zuzendutako ‘Homeless Home’ film laburrak fantasiazko unibertso jakin batean kokatutako istorio existentzialista eta soziala jorratzen du. Proiektu hau UniKoren, Frantziako Autour de Minuit ekoiztetxearen eta Madrilgo AltContent produkzio-etxearen arteko koprodukzioa da. Miñanbresek ‘Dekoratua’ lanagatik Goya saria irabazi zuen 2017an, eta 2019an ‘Hilobi bat naiz’ film laburrarengatik izendatu zuten, bere ibilbidean zehar egindako dozenaka aintzatespenen artean.

Bestalde, Izibene Oñederra azkoitiarrak Frantziako lehiaketan parte hartuko du 2019ko Kimuak katalogoan sartu den ‘Lursaguak’ lanarekin. Filmak, gainera, Donostiako Zinemaldiko Zabaltegi atalean parte hartu zuen, eta Malagako Jaialdiak, Animasivok (Mexiko) eta Zinebik ere hautatu dute. Sortzaile eta ekoizle gipuzkoarrak ‘Beti Bezperako Koplak’ (2016), ‘Berbaoc’ (2008), ‘Amar’ (2010) eta ‘Areka’ (2017) filmetan parte hartu du, halaber. Annecyn, berriz, kontaketa ilun bat aurkeztu du, giza izaerak esparru garaikidean duen zereginari buruzkoa.

Aurtengo Annecyko aukeraketan ordezkaritza handiena duten herrialdeak Frantzia, Ameriketako Estatu Batuak, Erresuma Batua, Kanada, Alemania, Txina eta Hego Korea dira. Edizio digitala burutuko duten arren, 2020ko jaialdiaren zati bat 2021era atzeratu dute. Afrikako animazioari omenaldia egingo diote datorren urtean, jaialdiaren 60. urteurrenaren harira.