Aquitaine.eus
Euskara. Kultura. Mundura.
Eusko Jaurlaritzak eta Aquitaine eskualdeak osatzen zuten Akitania-Euskadi Euroeskualdeak, Etxepare Euskal Institutuak eta Euskal Kultur Erakundeak lankidetza hitzarmena sinatu zuten 2016ko urtarrilean.
Hitzarmenaren bitartez sinatzaileak lankidetzan ari dira bi norabidetan:
Batetik, Ipar eta Hegoaldeko euskal kultur sortzaileen lanak Akitaniako diziplina ezberdinetako jaialdi eta ekitaldietan erakusten dituzte. Bestetik, Akitaniako eta Euskadiko kultur sortzaile eta eragileen arteko mugaz gaindiko harremanak eta elkarlana sustatzen dituzte.
Gainera, 2017az geroztik, euroeskualdearen lurralde eremua bikoiztu egin da. Batetik, 2016an abiatu zen Frantziako lurralde antolaketa berriaren ondoren, Akitania eskualdeak bere baitan hartu ditu Poitou-Charentes eta Limousin eskualdeak Akitania Berria sortuz. Bestetik, Nafarroako Foru Erkidegoa ere euroeskualdearen partaide izatera pasa da, eta honekin, Nafarroako Gobernuaren Vianako Printzea Erakundea Aquitaine.eus proiektuko bazkide berria izatera pasa da.
Gaur egun, Akitania Berria-Euskadi-Nafarroa Euroeskualdeak 8,7 milioi biztanle ditu eta ia 100.000 kilometro karratuko azalera du.
Lotutako albisteak
-
2021-06-03 Hiru euskal konpainia Libourneko Fest’ Arts jaialdian
Abuztuaren 3tik 7ra kaleko arteen FEST´ARTS jaialdia ospatuko da Libournen, eta aurten Amaia Elizaran, Lasala eta Deabru Beltzak konpainia euskaldunak izango dira bertan.
-
2019-11-19 Iruñea arteen erakusleiho bilakatuko da 948 Merkatuarekin
948 Merkatuaren 3. edizioa egingo da Iruñean asteazkenetik ostiralera. Arteen eta kultur industrien alorreko 700 inguru profesionalen topagune izango da azoka eta 50tik gora hitzaldi, tailer eta erakustaldi artistiko antolatu dituzte.
-
2019-11-14 Euskal leihoa Bordeleko Le Rocher de Palmer zentroan
Bordeleko Le Rocher de Palmer kultur zentroak euskal kulturari udazkenero eskaintzen dion leihoa bueltan da. Aurtengoan, batetik, Juantxo Puerta Extremera eta Ignacio Rubio González argazkilari nafarren erakusketa bat aurkeztu zen azaroaren 5ean; eta bestetik, egun berean, Iñaki Salvadorren seiko formazioaren eta Mielotxin taldearen kontzertu bana izan zen.
