Koldo Mitxelena Katedra 2025: Ander Egurtzegi

Etxepare Euskal Institutuak Chicagoko Unibertsitatean sustatzen duen Koldo Mitxelena Katedrako ikerlari gonbidatua Ander Egurtzegi izango da.

Chicagoko Unibertsitateko doktoretza ikaslentzako mintegia eskainiko du Ander Egurtzegik, soinu-aldaketan edo euskararen hots egituran interesa dutenei bereziki zuzendua. Mintegi honetan, hots aldaketaren teoriei dagozkien hizkuntza-alderdi asko aurkeztuko dira. Mintegiaren ardatza euskara izango da, nahiz eta noizbehinka beste hizkuntza gutxitu batzuetako kasu-azterketak egingo diren (hala nola Ribagortzako aragoierarenak edo lakota hizkuntzarenak). Mintegiaren oinarrizko gaiak honako hauek izango dira: soinu aldaketaren funts fonetikoa, egungo aldakortasuna aldaketa historikoaren hazi gisa, hizkuntzen arteko kontaktuaren eragina, hots aldaketak hizkuntza-ikuspegi desberdinetatik aztertzearen abantailak, tipologikoki ezohikoak diren hots aldaketak, eta desagertzeko arriskuan dauden hizkuntzen dokumentazio fonetiko zehatzaren garrantzia, bai hots aldaketaren ikerketarako zein hizkuntzaren egituraren ikerketarako oro har.